Rede Feto Fasilita Grupu Alegria Fahe Shu
Rede Feto Timor-Leste liuhusi projetu Hakbi'it Feto hala'o fasilitasaun ba Grupu Alegria atu fahe SHU (Sisa Hasil Usaha) tinan 2023-2024 nian, ho sira nia aksoes hamutuk USD 4,823.00. Grupu Alegria hanesan grupu VSLA (Village Saving and Load Associations) ne'ebe forma husi inan-feto sira iha Aldeia Bekusi, Suku Bekora, Postu Administrativu Cristo Rei. Grupu ne'e hala'o atividade rai no empresta osan hodi sustenta nesesidade família nian no oras ne'e grupu dezenvolve diak tebes.
Haktuir Value Chain Officer ba Projetu Hakbi'it Feto, Donela Guterres hateten katak Prezensa Rede Feto iha atividade ne'e atufo esplikasaun kona-ba formula fahe SHU no akompaña grupu sira fahe SHU.
Haktuir Silvina de Arauju, membru Grupu Alegria hateten katak nia haksolok tebes ohin bele fahe ona sira nia osan ne'ebe mak rai hamutuk durante tinan ida. nia mos hatutan katak foin tinan ida envolve iha grupu, tanba hetan esplikasaun husi nia oan feto ne'ebe mak envolve uluk ona iha grupu rai no empresta osan ne'e no nia akompaña atividade ne'e fo benefisiu ba membru sira. nune'e iha tinan da-ruak Silvina Araujo ofisialmente inklina-an iha grupu ne'e, no nia hateten katak liu husi atividade ne'e ajuda ona nia bele loke negosiu kios hodi sustenta ekonomia família.
Iha parte seluk haktuir Rozita Oki, hanesan mos membu Grupu Alegria hateten katak nia envolve-an iha grupu ne'e tinan rua ona husi 2022 to'o agora, benefisiu ne'ebe nia hetan husi programa VSLA maka nia bele asesu empréstimu ho fasil hodi selu nia oan nia eskola.
Depois de remata fahe SHU, Grupu kontinua halo Planu rai no empresta osan tinan 2024-2023, sira deside atu hasa'e osan-funan husi 5% ba 10% no funsu ba sosiál husi 0.5 centavos ba $1, no aksoes kada fulan husi $ 10 to'o $50.
Grupu Alegria eziste iha tinan 2022 hahu ho membru nain 15 no agora membru sa'e ba nain 30. Grupu ne’e forma tanba hetan fasilitasaun no apoiu formasaun husi Rede Feto Timor-Leste no ADRA Timor-Leste liuhusi Projetu Hakbi’it Feto, ne’ebe apoiu fundu husi União Europeia no Ko-Finanseiru husi Ajensia Dezenvolvimentu Austriaka.
