Rede Feto Timor-Leste ho haksolok hato’o Parabens ba kargu foun Feto maluk Marquita da Cunha, nudar Feto dahuluk ne’ebe komando F-FDTL promove ba kapitaun iha instituisaun Falintil Forsa Defeza Timor-Leste (F-FDTL).

Loron 02-02-2024 hanesan loron istóriku ida ba instituisaun Falintil Forsa Defeza de Timor-Leste (F-FDTl) tamba foin primeira vez iha Instituisaun F-FDTL, alinde promove 210 pesoas husi komponentes no Unidade, Instituisaun F-FDTL mos promove Feto Potensial ida husi Posto Tenente ba iha Offisial kapitaun, atual Xefe Jéneru iha Quartel General F-FDTL Kapitaun Marquita da Cunha.

Kapitaun Marquita da Cunha, hafoin remata eskola sekundária, kontinua estudu iha UNTL iha área konstrusaun sivil, maibe, la konsege remata tanba problema familia no obriga Kapitaun Marquita da Cunha tenki para eskola no fila ba tulun família liu husi loke negosiu kiik hanesan loke kios, maibe Iha tinan 2016 Kapitaun Marquita Da Cunha konsege remata nia estudu iha nivel licenciatura Departamentu Relasaun Internasionál, Fakuldade de Siénsia Sosiais.

Kapitaun Marquita da Cunha moris husi inan aman to’os nain ne’ebé simples moris husi familia baibain maibe ho mehi ne’ebe as, uluk nia gosta forsa maibe nia la imajina atu sai forsa, tanba forsa tuir nia hanoin no hatene treinamentu nudar Militar ne’e todan tebes.

Iha tinan 2002, bainhira instituisaun F-FDTL loke oportunidade ba foin-sa’e sira, Kapitaun Marquita da Cunha mos koko aplika ba Vaga refere maibe nia la espera katak nia atu passa tanba lafiar-an kompete ho mane maluk sira.

Depois liu husi prosesu lubun ida, finalmente nia hetan resultadu positivu "Passa" sai membru F-FDTL. Durante hala'o kna'ar hanesan forsa F-FDTL Kapitaun Marquita da Cunha hetan promosaun dala haat, hahu husi promosaun dahuluk nudar Furiel, Promosaun daruak Nudar Sargerntu, promosaun datoluk nudar Tenente no no promosaun dahaat nudar Kapitaun.