Rede Feto, ADRA, UE Apoia Tara Bandu Violénsia Bazeia ba Jéneru iha Maliana

Maliana, 15 Agostu 2024 – Rede Feto Timor-Leste iha kolaborasaun ho Ajénsia Dezenvolvimentu no Asisténsia Adventista (ADRA) Timor-Leste iha Projetu Hakbiit Feto lansa ona Regulamentu Tara Bandu atu kombate violénsia bazeia ba jéneru no violénsia doméstika iha Postu Administrativu Maliana, Munisípiu Bobonaro. Tara Bandu ida-ne’e realiza atu bele haforsa liután implementasaun Lei Kontra Violénsia Doméstika ne’ebé vigora iha Timor-Leste, liuliu hodi prevene akontesimentu kazu violénsia bazeia ba jéneru no violénsia doméstika.

Iha lansamentu regulamentu tara bandu ne’e, Embaixadór UE nian, Sr. Marc Fiedrich hateten: “Tara bandu bele kontribui papél importante ba sustenta sistema justisa formál, partikularmente iha prevensaun no rezolusaun konflitu, liu hosi estabelesimentu relasaun hanesan dalan ida hodi respeitu lei no respeitu ba kultura. Ho lei sira ne’ebé loos no tara bandu ne’ebé loos, lei rua bele servisu hamutuk hodi haforsa malu.”

Regulamentu Tara Bandu ida-ne’e hanesan Tara bandu dahuluk ne’ebé adota iha postu Maliana. Bainhira viola regulamentu ne’e sei aplika sansaun hirak ne’ebé previstu iha Tara bandu ne’e. Sansaun hirak ne’e sei aplika bazeia ba prátika kulturál husi komunidade Bunak no Kemak no espesífiku ba suku hitu iha postu Maliana ne’ebé implementa pilotu regulamentu ida ne’e (Ritabou, Lahomea, Holsa, Odomau, Raifun, Tapo-Memo, no Saburai). Regulamentu ida-ne’e mós sei sai hanesan referénsia ba Postu sira seluk ne’ebé iha futuru hakarak aplika regulamentu tara bandu iha sira-nia postu no suco sira.

Regulamentu Tara Bandu ne’e dezenvolve atu hatán ba preokupasaun no dezafiu ne’ebé vítima sira hasoru durante andamentu prosesu justisa nian, prosesu jurídiku ne’ebé lori tempu naruk no distánsia ne’ebé dook afeta mós ba kondisaun ekonomia vítima nian. Regulamentu ida ne’e dezenvolve liu hosi Projetu Hakbiit Feto ho apoiu finanseiru husi Uniaun Europeia, no Finansia hamutuk husi Ajénsia Dezenvolvimentu Austríaka. Objetivu jerál husi projetu ne'e mak atu empodera feto sira liuhusi hasa'e sira-nia partisipasaun iha atividade sosiál no ekonomiku.

###

Informasaun liután kona-ba mídia nian, favor kontaktu:

1. Deonisio Alves, Jerente Projetu ADRA Timor-Leste,

deonisio.alves@adra.tl

2. Akito Ximenes, Ofisial Imprensa & Informasaun Delegasaun UE iha Timor-Leste

Akito-Francisco.DE-JESUS-XIMENES@eeas.europa.eu