I. Istória badak organizasaun

Iha loron 26, fulan abril, tinan 2008, emprezaria hamutuk haat nulu resun tolu (43) hari’i AEMTL ho objetivu atu kria oportunidade no insentivu ba emprezariu timor-oan sira hodi fiar-an no motiva-an hodi kontribui ba dezenvolvimentu nasaun nian.

Sai hanesan mahon ba negósiu sira seluk, iha sektor oin-oin, hanesan Turismu, Komérsiu, Importasaun, Konstrusaun Sivil, no selun tan, AEMTL hakarak suporta emprezariu timor-oan sira atu hasoru dezafiu no atu kompete iha panorama emprezarial Timor-Leste nian, ho hanoin atu kontribui ba dezenvolvimentu ekonomia nasaun nian.

Ho néon tomak, empreendedora timor-oan hamutuk 43 fiar katak bele hetan dalan hodi suporta feto sira ne’ebé berani no hakarak sai parseiru forte ida ba sira nia família rasik no ba Governu Timor-Leste nian. AEMTL nia objetivu prinsipál mak atu promove no enkoraja maluk feto timor sira atu berani no fiar iha sira nia empreendimentu, liu husi programa formasaun no kolaborasaun ho instituisaun internasionál sira no mos ho governu. AEMTL mos haforsa kapasidade emprezarial liu husi partilla informasaun no koñesimentu ba sistema no mekanisu emprezarial sira.

II. Visaun no Misaun oranizasaun

Vizaun AEMTL: Asertividade, Empoderamentu, Motivasaun, Traballo no Lideransa. Atu bele sai referensia exselensia ida ba dezenvolvimentu negósiu sira no kresimentu ekonomiku ne'ebé lidera husi Feto Timor.

Misaun AEMTL nia misaun hatur iha pilar tolu:

1. Haforsa kompetitividade Feto emprezaria sira liu husi promosaun no kapasitasaun feto sira atu dezenvolve no estabelese sira nia an rasik ho maneira sustentavel

2. Dezenvolve feto sira nia kapasidade emprezarial atu haluan, haboot no identifika oportunidade foun, no

3. Suporta desenvolvimentu ekonomiku no independensia feto sira iha Timor-Leste.